सोलुखुम्बुको अनुभवी आरोही फुरतेन्जी शेर्पा एनएमए सदस्य पदका लागि मनोनयन
सोलुखुम्बु — माप्य दुधकोशी गाउँपालिका–१, बुम्बुरीका फुरतेन्जी शेर्पा आज, आगामी भदौ ८ गते हुने नेपाल पर्वतारोहण संघ (एनएमए)को सदस्य पदका लागि औपचारिक रूपमा मनोनयन गराएका छन्। २०१२ देखि भरिया र ट्रेकिङ गाइडको पेशामा संलग्न फुरतेन्जी हाल आरोहन पेशामा सक्रिय छन्।
उनले सगरमाथा दुईपटक आरोहणसहित ल्होत्चे, मकालु, मनासलु, हिमलुङ, अमाडब्लम लगायत दर्जनौँ ६००० मिटर माथिका हिमालहरू सफलतापूर्वक आरोहण गरिसकेका छन्। उनी शेर्पा समाज माप्य दुधकोशीका संस्थापक सचिव र सगरमाथा आरोही संघका साधारण सदस्यसमेत हुन्।
फुरतेन्जी शेर्पाले तालिम र दक्षतामा पनि विशेष ध्यान दिएका छन्। उनीसँग ट्रेकिङ गाइड तालिम, बेसिक माउन्टेनियरिङ कोर्स, बेसिक माउन्टेन रेस्क्यु तालिम, हाई माउन्टेन रेस्क्यु तालिम, र लायजोन अफिसर तालिमको अनुभव छ। यी तालिमले उनलाई आरोहण र पर्यटन क्षेत्रमा सुरक्षित तथा व्यवस्थित कामको लागि सक्षम बनाएको छ।
उनले आफ्नो अभियानको मूल मन्त्र ‘सुरक्षित आरोहण, दिगो पर्यटन र हिमालको सम्मान’ लाई राख्दै यसरी प्रतिबद्धता व्यक्त गरेका छन्:
आरोही अधिकार र सुरक्षा: आरोहीहरूको जीवन बीमा, उचित पारिश्रमिक र विशेष कानुन निर्माण।
व्यवसायिक तालिम र प्रमाणिकरण: समयसापेक्ष आरोहण तालिम र अन्तर्राष्ट्रिय मापदण्डअनुसार प्रमाणपत्र प्रणाली लागू।
सुशासन र पारदर्शिता: हिमाली क्षेत्रमा अनावश्यक राजनीतिक हस्तक्षेपको अन्त्य र पर्यटन क्षेत्रको आम्दानी–खर्चको सार्वजनिक लेखा परीक्षण।
हिमाल र प्रकृतिको सम्मान: सरसफाइ, वातावरणीय संरक्षण र प्लास्टिक–फोहोरमुक्त हिमाल क्षेत्र निर्माण।
फुरतेन्जी शेर्पाले भन्नुभयो, “मेरो उद्देश्य केवल आरोहण मात्र होइन, संघलाई नयाँ उर्जा, सुरक्षित र व्यवस्थित पर्यटन, र हिमालको संरक्षणतर्फ अघि बढाउनु हो। मेरो उम्मेदवारीले संघलाई समृद्धि र विश्वासको नयाँ दिशा दिनेछ।”
प्रतिक्रिया दिनुहोस्