शिक्षा, नेतृत्व र प्रतिभा विकासमा अग्रणी रिलायन्सद्वारा विद्यार्थी सम्मान कार्यक्रम सम्पन्न

काठमाडौं । गुणस्तरीय, प्रविधिमैत्री तथा व्यवहारिक शिक्षामार्फत उत्कृष्ट शैक्षिक वातावरण निर्माण गर्दै आएको Reliance International Academy ले माध्यमिक शिक्षा परीक्षा (एसईई) ब्याच २०८२ का विद्यार्थीहरूको सम्मान तथा बिदाइ कार्यक्रम भव्य रूपमा सम्पन्न गरेको छ । विद्यालय परिसरमा आयोजित कार्यक्रममा विद्यार्थी, अभिभावक, शिक्षक तथा विभिन्न क्षेत्रका व्यक्तित्वहरूको उल्लेखनीय उपस्थिति रहेको थियो ।
कार्यक्रममा एसईई परीक्षामा उत्कृष्ट नतिजा हासिल गरेका विद्यार्थीहरूलाई सम्मान गरिएको थियो । विद्यालयका अनुसार सहभागी विद्यार्थीहरूमध्ये धेरैले उत्कृष्ट जीपीए ल्याएका छन् भने केही विद्यार्थीले ४ जीपीएसमेत प्राप्त गरी विद्यालयको गौरव बढाएका छन् । कार्यक्रममा विद्यार्थीहरूको मेहनत, शिक्षकहरूको समर्पण तथा अभिभावकहरूको विश्वासलाई विद्यालयको सफलताको मुख्य आधारका रूपमा प्रस्तुत गरिएको थियो ।
कार्यक्रमका प्रमुख अतिथि तथा शिक्षा विकास तथा समन्वय इकाई काठमाडौंका प्रमुख Suresh Kumar Joshi ले शिक्षक, विद्यार्थी तथा अभिभावकलाई धन्यवाद व्यक्त गर्दै शिक्षालाई व्यवहारसँग जोड्नुपर्ने आवश्यकता औँल्याए । उनले केवल ४ जीपीए प्राप्त गर्नु नै ठूलो उपलब्धि नभई त्यसलाई जीवनमा व्यवहारिक रूपमा उतार्न सक्नु अझ महत्वपूर्ण पक्ष भएको बताए ।
“जीवनमा आइपर्ने हरेक समस्यालाई समाधान गर्न सक्ने क्षमता नै वास्तविक शिक्षा हो,” उनले भने, “शिक्षालाई सीप, संस्कार तथा जीवनोपयोगी अभ्याससँग जोडेर अघि बढाउन आवश्यक छ ।” पाठ्यक्रममा आधारित शिक्षासँगै व्यवहारिक ज्ञान, नैतिक शिक्षा तथा संस्कारलाई पनि समान रूपमा महत्व दिनुपर्ने उनको भनाइ थियो ।
कार्यक्रमका विशेष अतिथि तथा रिलायन्स नेटवर्कका बोर्ड सदस्य Rajukumar Shivakoti ले रिलायन्सले आफूलाई उत्कृष्ट शैक्षिक संस्थाका रूपमा स्थापित गरिसकेको उल्लेख गरे । उनले विद्यालयले विद्यार्थीहरूको शैक्षिक विकाससँगै नेतृत्व क्षमता, सामाजिक उत्तरदायित्व तथा अतिरिक्त प्रतिभा विकासमा विशेष ध्यान दिँदै आएको बताए ।
विद्यालयका प्रिन्सिपल Khemraj Bhusal ले स्वागत मन्तव्य व्यक्त गर्दै विद्यालयको उत्कृष्ट नतिजा विद्यार्थीहरूको अथक मेहनत, शिक्षकहरूको समर्पण, अभिभावकहरूको विश्वास तथा विद्यालय व्यवस्थापनको सामूहिक सहकार्यको प्रतिफल भएको बताए । उनले रिलायन्स इन्टरनेशनल एकेडेमीले अनुशासन, संस्कार, गुणस्तरीय शिक्षा तथा व्यवहारिक सिकाइलाई प्राथमिकतामा राख्दै विद्यार्थीहरूको सर्वाङ्गीण विकासमा निरन्तर काम गर्दै आएको उल्लेख गरे ।
कार्यक्रममा विद्यार्थीहरूले स्वागत नृत्य, विद्यालय गीत, सांगीतिक प्रस्तुति, अनुभव आदान–प्रदान तथा भावुक बिदाइ गीत प्रस्तुत गरेका थिए । साथै शिक्षक सम्मान, मायाको चिनो वितरण, विद्यार्थी सम्मान तथा शुभकामना आदान–प्रदानलगायत विविध कार्यक्रम सम्पन्न गरिएको विद्यालयले जनाएको छ ।
विद्यालयले आगामी दिनमा पनि विद्यार्थीहरूलाई अन्तर्राष्ट्रिय स्तरको गुणस्तरीय शिक्षा प्रदान गर्दै उनीहरूको प्रतिभा, क्षमता र नेतृत्व विकासमा अझ प्रभावकारी भूमिका निर्वाह गर्ने प्रतिबद्धता व्यक्त गरेको छ ।