४ दशमलव ० जिपिए प्राप्त विद्यार्थीसहित रिलायन्स इन्टरनेशनल एकेडेमीको २६औँ माध्यमिक शिक्षा परीक्षा सम्मान तथा बिदाइ समारोह भव्य सम्पन्न

काठमाडौं । Reliance International Academy ले माध्यमिक शिक्षा परीक्षा ब्याच–२०८३ का विद्यार्थीहरूको सम्मान, बधाइ तथा बिदाइका लागि आयोजना गरेको २६औँ माध्यमिक शिक्षा परीक्षा सम्मान तथा बिदाइ कार्यक्रम आइतबार अत्यन्त भव्य, सुसंस्कृत र भावनात्मक वातावरणमा सम्पन्न गरेको छ । विद्यालय परिसरमा सम्पन्न कार्यक्रममा विद्यार्थी, अभिभावक, शिक्षक, विद्यालय व्यवस्थापन समिति, विशिष्ट अतिथि तथा शुभेच्छुकहरूको उल्लेखनीय सहभागिता रहेको थियो ।
विद्यालयले यस वर्षको माध्यमिक शिक्षा परीक्षामा उत्कृष्ट सफलता हासिल गरेका विद्यार्थीहरूलाई सम्मान गर्दै उनीहरूको उज्ज्वल भविष्यको शुभकामना व्यक्त गरेको हो । विशेषगरी ४ दशमलव ० जिपिए प्राप्त गर्न सफल विद्यार्थीहरूलाई विशेष सम्मान तथा मायाको चिनो प्रदान गरिएको क्षण कार्यक्रमको मुख्य आकर्षण बनेको थियो ।

कार्यक्रमको उद्घोषण विद्यालयका सहायक प्रधानाध्यापक तथा अतिरिक्त क्रियाकलाप संयोजक श्रीधरप्रसाद पौडेलले गर्नुभएको थियो । कार्यक्रमको सभापतित्व विद्यालय व्यवस्थापन पक्षका अध्यक्ष रवीन्द्रजङ्ग थापाले गर्नुभएको थियो भने शिक्षा विकास तथा समन्वय इकाई काठमाडौंका प्रमुख सुरेश कुमार जोशी प्रमुख अतिथिका रूपमा उपस्थित हुनुहुन्थ्यो ।
दीप प्रज्वलनबाट सुरु भएको कार्यक्रममा गायत्री आचार्य, निलम अमात्य र सञ्जु मैनालीले अतिथिहरूलाई खादा अर्पण गरी स्वागत गर्नुभएको थियो । त्यसपछि प्रमुख संस्कृति विभागका दामोदर निरौलाले ध्यान कार्यक्रम सञ्चालन गर्नुभएको थियो । कार्यक्रममा कक्षा १० का विद्यार्थीहरूले प्रस्तुत गरेको राष्ट्रिय गानले सम्पूर्ण वातावरणलाई राष्ट्रिय भावनाले भरिएको बनाएको थियो ।
त्यसपछि प्रस्तुत गरिएको विद्यालय गीत “रियाको रम्य रश्मीमा” तथा स्वागत गान “यो मन त मेरो नेपाली हो…” ले कार्यक्रमलाई अझै उत्साहपूर्ण र जीवन्त बनाएको थियो । विद्यार्थीहरूले प्रस्तुत गरेका गीत, संगीत तथा नृत्यहरूले विद्यालयमा रहेको प्रतिभा, अनुशासन र सांस्कृतिक विविधतालाई प्रभावकारी रूपमा प्रस्तुत गरेका थिए ।

कक्षा १० “ख” की छात्रा सम्पदा काफ्लेले स्वागत मन्तव्य राख्दै विद्यालयसँग बिताएका अविस्मरणीय क्षणहरू स्मरण गरेकी थिइन् । उनले शिक्षकहरूको मार्गदर्शन, अभिभावकको साथ र विद्यालयले दिएको अवसरका कारण आफूहरू सफलताको यात्रामा अघि बढ्न सकेको बताएकी थिइन् ।
विद्यालयका प्रिन्सिपल खेमलाल भुसालले आफ्नो मन्तव्यमा रिलायन्स इन्टरनेशनल एकेडेमीले केवल परीक्षामुखी शिक्षा नभई संस्कार, अनुशासन, नेतृत्व क्षमता र जीवनोपयोगी शिक्षालाई प्राथमिकतामा राख्दै आएको बताउनुभयो । उहाँले माध्यमिक शिक्षा परीक्षा उत्तीर्ण विद्यार्थीहरूलाई बधाइ दिँदै आगामी यात्रामा आत्मविश्वास, इमानदारी र जिम्मेवारीका साथ अघि बढ्न आग्रह गर्नुभयो ।
उहाँले विद्यालयले प्रविधिमैत्री, आधुनिक तथा गुणस्तरीय शिक्षाका माध्यमबाट विद्यार्थीहरूको सर्वाङ्गीण विकासमा निरन्तर काम गरिरहेको उल्लेख गर्दै आगामी दिनमा अझ उत्कृष्ट नतिजा हासिल गर्ने विश्वास व्यक्त गर्नुभयो ।
कार्यक्रममा कक्षा १० “क”, “ख” र “ग” का विद्यार्थीहरूलाई चरणबद्ध रूपमा सम्मान तथा बधाइ ज्ञापन गरिएको थियो । विद्यार्थीहरूलाई मायाको चिनोसहित सम्मान गरिनुका साथै उनीहरूको मेहनत, अनुशासन र सफलताको खुलेर प्रशंसा गरिएको थियो ।

विशेषगरी ४ दशमलव ० जिपिए प्राप्त गर्न सफल विद्यार्थीहरूलाई गरिएको विशेष सम्मानले कार्यक्रममा थप गौरव थपेको थियो । आफ्ना छोराछोरी र विद्यार्थीहरूको उपलब्धिमा अभिभावक तथा शिक्षकहरू गर्वित देखिन्थे ।
सांस्कृतिक प्रस्तुतिहरू कार्यक्रमका अर्को प्रमुख आकर्षण बने । कक्षा १० का विद्यार्थीहरूले प्रस्तुत गरेको “स्याजी होइ” तथा तामाङ सेलो नृत्यले नेपाली मौलिक संस्कृतिको झल्को दिएको थियो भने नेवारी नृत्यले काठमाडौं उपत्यकाको सांस्कृतिक पहिचानलाई जीवन्त बनाएको थियो । नेपाली मिश्रित लोकनृत्य प्रस्तुत हुँदा सम्पूर्ण हल तालीले गुन्जिएको थियो ।
कार्यक्रममा विशेष अतिथि, अभिभावक प्रतिनिधि तथा विद्यालय व्यवस्थापन पक्षका प्रतिनिधिहरूले पनि मन्तव्य राख्दै विद्यालयको शैक्षिक गुणस्तर, अनुशासन र विद्यार्थीमैत्री वातावरणको प्रशंसा गरेका थिए ।
सभापति रवीन्द्रजङ्ग थापाले रिलायन्स इन्टरनेशनल एकेडेमीले विद्यार्थीलाई केवल शैक्षिक रूपमा सक्षम मात्र नभई असल, जिम्मेवार र संस्कारित नागरिकका रूपमा विकास गर्ने उद्देश्यका साथ काम गरिरहेको बताउनुभयो । उहाँले विद्यालय परिवार, शिक्षक, अभिभावक तथा विद्यार्थीहरूको सामूहिक प्रयासकै कारण विद्यालयले निरन्तर उत्कृष्ट नतिजा हासिल गरिरहेको उल्लेख गर्नुभयो ।
प्रमुख अतिथि सुरेश कुमार जोशीले विद्यालयले शिक्षा क्षेत्रमा पुर्‍याएको योगदानको प्रशंसा गर्दै माध्यमिक शिक्षा परीक्षा उत्तीर्ण विद्यार्थीहरूलाई उज्ज्वल भविष्यको शुभकामना व्यक्त गर्नुभयो । उहाँले शिक्षा केवल प्रमाणपत्रमा सीमित नभई व्यक्तिको सोच, व्यवहार र चरित्र निर्माणसँग जोडिएको विषय भएको उल्लेख गर्नुभयो ।
कार्यक्रममा शिक्षकहरूलाई पनि सम्मान तथा मायाको चिनो वितरण गरिएको थियो । साथै उपस्थित अतिथिहरूलाई सभापतिद्वारा मायाको चिनो हस्तान्तरण गरिएको थियो ।
माध्यमिक शिक्षा परीक्षा उत्तीर्ण विद्यार्थी निष्ठा थापा मगरले धन्यवाद मन्तव्य व्यक्त गर्दै विद्यालय, शिक्षक, अभिभावक तथा सम्पूर्ण व्यवस्थापनप्रति आभार व्यक्त गरेकी थिइन् । अन्त्यमा कक्षा १० का विद्यार्थीहरूले प्रस्तुत गरेको बिदाइ गीत “जीवनको बाटोमा तिमी सँधै…” ले कार्यक्रमलाई भावुक बनाएको थियो ।
औपचारिक कार्यक्रम समापनसँगै रिलायन्स इन्टरनेशनल एकेडेमीले आफ्नो २६औँ माध्यमिक शिक्षा परीक्षा सम्मान तथा बिदाइ कार्यक्रमलाई केवल औपचारिक समारोहमा सीमित नराखी विद्यार्थीहरूको सफलता, संस्कृतिको सम्मान र भावनात्मक सम्बन्धको अविस्मरणीय उत्सवका रूपमा स्थापित गरेको सहभागीहरूले बताएका छन् ।