सडक दुर्घटनामा हाम्रो संलग्नता छैन : जेभियर एकेडेमी बेस्ट एलिमेन्टरी स्कुल

काठमाडौं । जेभियर एकेडेमी बेस्ट एलिमेन्टरी स्कुलले आफ्नो स्टिकर भएको माइक्रोभ्यानले दुई विद्यार्थीलाई ठक्कर दिएको घटनाप्रति गहिरो दुःख व्यक्त गर्दै आधिकारिक स्पष्टिकरण सार्वजनिक गरेको छ।

विद्यालयले जारी गरेको विज्ञप्तिमा दुर्घटनासँग विद्यालयको प्रत्यक्ष संलग्नता नभएको र मिडियामा संस्थाको नाम जोडिनु दुःखद भएको उल्लेख छ। शुभेच्छुकहरूले जानकारी गराएपछि मात्रै प्रशासनले घटना बारे थाहा पाएको विद्यालयले जनाएको छ।

विद्यालयका अनुसार सो माइक्रोभ्यान विद्यालयद्वारा सञ्चालन गरिएको थिएन। यसअघि सह-सम्बद्ध संस्था जेभियर एकेडेमी बेस्ट मोंटेसोरी ले भाडामा लिएको भए पनि करिब एक महिना अघि नै सवारी फिर्ता गरिएको र त्यसपछि गाडी मालिककै जिम्मामा रहेको प्रष्ट पारिएको छ।

प्रधानाध्यापक सुष्मा लामाले भनिन्, “हामी लापरवाह चालकको कार्यको कडा निन्दा गर्दछौं र वास्तविक दोषीको पहिचानमा प्रहरी प्रशासनलाई पूर्ण सहयोग गर्नेछौं। विद्यालयले फिर्ता गरिसकेको सवारीमा हाम्रो स्टिकर प्रयोग हुनु भ्रामक र अस्वीकार्य छ।”

उनले थपिन्, “दुर्घटनाबाट प्रभावित विद्यार्थी र परिवारप्रति हामी गहिरो समवेदना प्रकट गर्दछौं। जेभियर एकेडेमी बेस्ट एलिमेन्टरी स्कुल पारदर्शिता र जवाफदेहितामा निरन्तर अडिग रहनेछ।”

विद्यालयले घटनाबाट उत्पन्न भ्रम चिर्दै भविष्यमा यस्ता असुविधा नदोहो¥याउन आवश्यक पहल गर्ने प्रतिबद्धता पनि जनाएको छ।