आकाशदीप कलेजले तीज नृत्य प्रतियोगिता आयोजना गर्ने

काठमाडौं । आकाशदीप कलेजले आगामी भाद्र ९ गते, सोमबार तीज नृत्य प्रतियोगिता आयोजना गर्ने भएको छ। कलेज प्राङ्गणमै आयोजना हुने उक्त प्रतियोगिता विशेषगरी विद्यार्थीहरूलाई लक्षित गरिएको कलेज प्रशासनले जनाएको छ।

कार्यक्रमबारे जानकारी दिँदै आकाशदीप कलेजका प्रिन्सिपल मदन सुवेदीले भने, “हामीले तीजलाई केवल महिलाको पर्वको रूपमा मात्र होइन, संस्कार, संस्कृति र कला अभिव्यक्तिको माध्यमका रूपमा पनि लिनुपर्छ भन्ने सोचका साथ यो प्रतियोगिता ल्याएका हौं। विद्यार्थीहरूले आफ्नो प्रतिभा प्रदर्शन गर्ने मात्र होइन, परम्परा र संस्कृतिसँग जोडिन पनि सक्नेछन्।”

उनका अनुसार प्रतियोगितामा सहभागी विद्यार्थीहरूले तीजका पारम्परिक गीतमा नृत्य प्रस्तुत गर्नेछन्। “यस्ता कार्यक्रमहरूले विद्यार्थीलाई मनोरञ्जनसँगै सामाजिक मूल्य र सांस्कृतिक चेतनाको पाठ सिकाउँछन्,” सुवेदीले थपे।

कलेजले विद्यार्थीहरूलाई व्यापक सहभागिताको लागि आह्वान गरेको छ। आयोजकहरूले तीज प्रतियोगिताले कलेजको शैक्षिक वातावरणमा उत्साह, उमंग र सांस्कृतिक एकताको संदेश दिने विश्वास लिएका छन्।