नेकपा एमालेको नयाँ नेतृत्व चयन आज साँझबाट, राति १२ बजेसम्म नतिजा आउने तयारी

नेकपा एमालेको नयाँ नेतृत्व चयनका लागि आज साँझ ७ बजेदेखि मतदान प्रक्रिया सुरु हुने भएको छ। पार्टी नेता विष्णु रिजालका अनुसार आजै राति १२ बजेसम्म मतगणना सम्पन्न गरी नतिजा सार्वजनिक गर्ने तयारी गरिएको छ।

मंगलबार साँझ आयोजित प्रेस ब्रिफिङमा नेता रिजालले मतदान व्यवस्थापनबारे जानकारी दिँदै राति ११ बजेसम्म मतदान सकिने र त्यसको एक घण्टाभित्र नतिजा सार्वजनिक गरिने बताए। उनका अनुसार एक जनाले करिब २० मिनेटमा मतदान गर्न सक्ने व्यवस्था मिलाइएको छ।

“८० वटा मेसिनमार्फत एकसाथ मतदान गराइनेछ। यसरी एक घण्टामा करिब ३ सय जनाले मतदान गर्न सक्छन्। राति ११ बजे मतदान सकिन्छ र १२ बजेसम्म नतिजा आउनेछ,” उनले स्पष्ट पारे।

नयाँ नेतृत्व चयनका लागि भइरहेको यस मतदान प्रक्रियालाई छिटो, व्यवस्थित र पारदर्शी बनाउन पार्टीले आवश्यक सम्पूर्ण तयारी पूरा गरिसकेको जनाएको छ।